2023ko Enpresa Lasterketaren 14. edizioa maiatzaren 14an ospatuko da. Tradizioa den bezala, El Diario Vasco, Donosti Eventos eta Adegik antolatutako proba honetan, Laboral Kutxaren babesarekin, nahi duten enpresa guztiek parte hartu ahal izango dute, tamaina, zerga-egoitza edo jarduera-mota edozein dela ere. Baldintza bakarra: enpresa bereko 4 kidezko taldeak osatzea eta helmugara elkarrekin iristea. Guztira 3 kategoria egongo dira, gizonezkoak, emakumezkoak eta mistoak, eta kategoria bakoitzeko lehen 3 sailkatuentzako sariak.

Aurreko edizioan, 590 taldek hartu zuten parte, 400 enpresa baino gehiago ordezkatuz, baina datorren edizioari begira, 2019ko zifrak hurbiltzea edo gainditzea espero dugu, orduan 710 taldek eman baitzuten izena.

10 langile baino gutxiagoko enpresak talde bat osatzeko elkartu daitezke. Autonomoek, bestalde, euren artean elkartuz taldeak osatu ahal izango dituzte. Proba honen helburu nagusiak argi daude: jarduera fisikoa eta talde-lana sustatzea eta zuzendarien eta langileen arteko lotura afektiboak sortzea.

Ohikoa denez, irteera 10: 00etan izango da, Alderdi Ederreko zabalgunean, udaletxearen aurrean. Hemendik, lasterkariek Boulevard hartuko dute Sagueserako norabidean. Bertan, bira bat egingo da Zurriolatik Salamancako Pasealekuraino itzultzeko eta handik Parte Zaharra zeharkatuko da Hernani kalera iritsi arte. Hortik tropela Zubieta kaletik eta Kontxa pasealekutik joango da Ondarretako hondartzara iristeko. Tenisetik gertu bira egin ondoren, Alderdi Ederrera arteko azken hiru kilometroak espaloitik egingo dira.